Kjaramálin mun væntanlega bera hæst, sem og öryggismál, á þingi Sjómannasambands Íslands sem haldið verður á fimmtudag og föstudag. Kjarasamningar sjómanna við Samtök fyrirtækja í sjávarútvegi hafa nú verið lausir í tæplega tvö ár.

Valmundur Valmundsson, formaður SSÍ, segir að lítið sé að gerast í kjaraviðræðum við Samtök fyrirtækja í sjávarútvegi (SFS). Hann segir ljóst að verkfallsboðun verði meðal þess sem rætt verði á þinginu og fá önnur úrræði séu eftir til að knýja á um samninga. Tímasetning verkfalls gæti tengst loðnuvertíðinni sem er fram undan í vetur.

Deilu sjómanna í SSÍ og SFS var vísað til ríkissáttasemjara í febrúar og viku af september slitnaði upp úr viðræðum. Valmundur segir að lögum samkvæmt sé boðað til fundar í deilunni ekki sjaldnar en á tveggja vikna fresti. Síðustu fundir hafi verið stuttir, spurt hvort nokkuð hafi breyst og fundi síðan verið slitið. Nánast sé um störukeppni að ræða.

Hann segir að á síðustu 23 mánuðum hafi lítið gerst í kjaramálum sjómanna annað en að samtök þeirra hafi tapað tveimur málum gegn SFS fyrir Félagsdómi, en þau tengdust túlkun á síðasta kjarasamningi. Helstu kröfur núna snúi að lífeyrisréttindum og að málum sem aðrir launþegar hafi náð fram með lífskjarasamningum.

Þing Sjómannasambandsins er haldið á tveggja ára fresti, en var frestað um ár í fyrrahaust vegna kórónuveirufaraldursins. Á þinginu verður formaður sambandsins kosinn og er Valmundur enn sem komið er einn í kjöri, en ekki er um eiginlegan framboðsfrest meðal þingfulltrúa að ræða. Valmundur var kosinn formaður SSÍ í desember 2014 og tók við formennsku af Sævari Gunnarssyni.

Tengdar fréttir

Kjaramál sjómanna

SVG og VM samþykktu samninginn

• Segir samninganefnd vélstjóra sniðgengna
• Felur í sér styttri vinnuviku og aukið mótframlag
• Vélstjórar undirrituðu samning við SFS
• „Ekki kjörstaða að vera í“

» Fleiri tengdar fréttir