Aftur grunur um smit í Bergey sem snéri til hafnar
Grunur er um að smit sé komið upp enn eina ferðina um borð í togaranum Bergey VE. Skipið er komið til hafnar í Vestmannaeyjum og er gert ráð fyrir að sýnataka fari fram í dag. Þetta herma heimildir 200 mílna.
Stutt er frá því að stöðva þurfti veiðar þegar skipverjar reyndust smitaðir í desember.
/frimg/1/22/35/1223546.jpg)
Skipið hélt til veiða frá Vestmannaeyjum um klukkan sjö í morgun eftir að lokið var við löndum um 80 tonnum sem komið var með til hafnar í Vestmannaeyjum í gærkvöldi. Var þá stefnan sett á miðin suður af Sólheimasandi en eftir nokkra siglingu austur fyrir Vestmannaeyjar vaknaði grunur um smit og var skipinu snúið við og haldið til hafnar á ný.
Arnar Richardsson, rekstrarstjóri Bergs Hugins, segir samtali við blaðamann að grunur hafi vaknað um smit. „Þetta er ekki staðfest smit, einn er grunaður og hann þarf bara að fara í sýnatöku. Við teflum ekkert á tvær hættur í þessu þessa dagana.“
Nokkur bræla hefur verið á miðunum og veðurhorfur eru versnandi að sögn Arnars. Fari allt að óskum heldur skipið til veiða á ný þegar veður gengur niður síðar í vikunni.
Sex smitaðir í desember
Í síðasta mánuði kom einnig upp smit um borð. Greindust þrír með hraðprófi þann 4. desember og reyndust síðar sex skipverjar smitaðir af veirunni. Áhöfnin var þá send í sóttkví og skipið sótthreinsað hátt og lágt.
Þann 12. desember gat skipið haldið til veiða á ný, en Bergey var jafnframt fyrsta skipið í flota Síldarvinnslunnar og dótturfélaga til að landa afla á nýju ári þegar það kom til hafnar í gærkvöldi.
