Tjón Hugins metið 540 milljónir í máli gegn ríkinu
Setja bókamerki
Tengdar fréttir
Makrílveiðar
Fyrirtaka var í vikunni fyrir Héraðsdómi Reykjavíkur í máli Hugins VE-55 gegn ríkinu vegna tjóns sem útgerðin varð fyrir við útgáfu makrílkvóta.
Lögmaður Hugins lagði fram matsgerð vegna tjónsins og nemur tjón útgerðarinnar um 540 milljónum króna, að sögn Sigurgeirs Brynjars Kristgeirssonar, framkvæmdastjóra Vinnslustöðvarinnar í Vestmannaeyjum, en fyrirtækið eignaðist öll hlutabréf í Hugin ehf. á síðasta ári. Að fyrirtöku lokinni var málinu frestað til 10. febrúar.
Hæstiréttur felldi tvo dóma í desember 2018 um að ekki hefði verið byggt á aflareynslu við útgáfu makrílkvóta á grundvelli reglugerða 2011 til 2014 eins og skylt hefði verið og sama fyrirkomulag hefði verið viðhaft fram til 2018.
Ríkið væri skaðabótaskylt í málinu þar sem ranglega hefði verið staðið að úthlutun kvótans og minna komið í hlut fyrirtækjanna en þeim hefði borið samkvæmt lögum.
Sjö útgerðarfélög stefndu ríkinu til greiðslu skaðabóta alls að upphæð um 10,2 milljarðar, en fimm félaganna féllu frá málarekstri.
Vinnslustöðin og Huginn héldu málinu áfram og var upphafleg krafa Vinnslustöðvarinnar upp á 982 milljónir króna og Hugins 839 milljónir. Að sögn Sigurgeirs Brynjars sættust aðilar á dómkvadda, óvilhalla matsmenn til að meta fjárhagslegt tjón.
Nánar má lesa um málið í Morgunblaðinu í dag.
