Vill ekki leðjuslag í formannskjöri VM

Guðmundur Helgi Þórarinsson, formaður VM Félags vélstjóra og málmtæknimanna, gefur lítið fyrir ásakanir fyrrverandi formanns VM, Guðmundar Ragnarssonar, sem nú hyggst sækja eftir embættinu á ný eftir að hafa tapað fyrir Guðmundi Helga árið 2018. Guðmundur Helgi segir ýmislegt misskilið í fullyrðingum mótframbjóðanda síns og leitt ef gera á formannskjörið að leðjuslag í stað þess að takast á um málefnaleg álitaefni.

Fram kom í Morgunblaðinu í dag að Guðmundur myndi gefa kost á sér í formannskjöri VM og sagðist hann jafnframt hafa fengið fjölda áskorana.

Kvaðst hann gefa kost á sér til að „stöðva það sem nú á sér stað innan félagsins“ og fullyrðir að unnið sé að því að nýtt félag undir merkjum 2F taki yfir stóran hluta af starfsemi VM án vitundar félagsmanna. Þetta segir Guðmundur Helgi misskilning á því sem á sér stað og segir að unnið sé að samstarfi við önnur félög sem hafa sameiginlega hagsmuni ekki að sameiningu félaga.

Frétt af mbl.is

Býður sig fram gegn formanni VM

„Hún hefur þegar – þessi samvinna sem við ætlum að móta undir sérstöku félagi sem við köllum 2F eða Fagfélögin – skilað árangri og við höfum talað um það að með því að hafa sérstakt félag utanum þessa vinnu þá getum við gert þetta eð færri mönnum eða aukið þjónustu við félagsmenn. Í öllu falli heldur VM eins og önnur félög að vera sjálfstæð félög. Menn hafa gengið inn í allskonar félög eins og til dæmis ASÍ án þess að glata sjálfstæði sínu,“ útskýrir Guðmundur Helgi.

Hann kveðst ávallt hafa verið talsmaður aukinnar samvinnu við önnur félag bæði á landi og á sjó til þess að hámarka sameiginleg áhrif. Fyrrnefnt félag er því samstarfsvettvangur að sögn Guðmundar Helga og bætir hann við að samvinnan nái til Rafiðnaðarsambands Íslands, Félags iðn- og tæknigreina, Matvæla- og veitingafélags Íslands og Félags byggingamanna „Þetta teljum við vera til hagsbóta fyrir félagsmenn, bæði fjárhagslega og eins mun þetta styrkja okkar rödd út á við.“

Guðmundur Ragnarsson hefur gefið kost á sér á ný til formanns VM.

Telur sig í miðri á

Þá vísar hann því einnig á bug að unnið hafi verið að samstarfinu án þess að veittar hafi verið upplýsingar um það. „Þetta hefur verið í gangi í allan vetur og stjórnin hefur allan tíman verið upplýst um þetta. Hins vegar hefur engin endanleg ákvörðun verið tekin um eitt eða neitt. Við þurfum og ætlum að kynna þetta fyrir trúnaðarráði. Ef við hefðum ekki lent í þessum síðustu samkomutakmörkunum Þá væri þetta á döfinni á næstu dögum.“

„Í stórum málum eru mismunandi skoðanir og ég tel mig staddan í miðri á í þeim verkefnum sem ég talaði fyrir þegar ég var kosinn fyrir fjórum árum – það væri mín bjargfasta trú að það myndi styrkja okkur að vinna saman. Það hefur þegar skilað sér. Við settum fram fyrir SFS tilboð fyrir áramót – öll stéttarfélögin fimm sem hafa sjómenn innandyra – og það hefur ekki gerst í áratugi að öll félögin hafi komið með sameiginlegt tilboð,“ útskýrir Guðmundur Helgi.

Segir fjárútlát hafa hlotið samþykkt

Ásakanir Guðmundar, formannsins fyrrverandi, varða einnig fjármál VM. „Svo eru fjármál félagsins [VM] í algjörum ólestri. Lög félagsins hafa verið þverbrotin en hundruðum milljóna hefur verið ausið úr sjóðum félagsins án löglegra heimilda,“ staðhæfði hann og bætti við að stjórn hefði ekki verið veittar upplýsingar um fjármálin. Meðal annars varðandi húsakaup og fullyrti Guðmundur: „Enginn veit hvernig allt að 200 milljónir hafi verið borgaðar úr sjóðum félagsins.“

Þetta segir Guðmundur Helgi af og frá og segir að fyrir öllum fjárútlátum hafi legið fyrir aðalfundar- og stjórnarsamþykktir. Þá sé heldur ekki rétt að stjórn hafi ekki fengið upplýsingar um fjármál félagsins.

„Við erum með níu manna stjórn, formann og átta stjórnarmenn. Svo erum við með átta varamenn. Varamenn fá alltaf sendar til sín allar upplýsingar og fundargerðir. Það hafa komið fram spurningar frá varamönnum, sumar hefur maður getað svarað en annað ekki sem varðar bókhald þar sem það liggur ekki fyrir sundurliðað, en við munum svara og senda alla ársreikninga þegar það liggur fyrir.“

Vélstjórafélag Íslands og Félag málmiðnaðarmanna voru sameinuð árið 2006 og varð þá til stéttarfélagið VM. mbl.is/Ómar Óskarsson

„Mér finnst leitt að farin sé þessi leið“

Guðmundur Helgi harmar einnig orð Guðmundar í fjölmiðlum þess efnis að mögulega sé grundvöllur fyrir lögreglurannsókn vegna fjármála félagsins. „Það hefur ekkert breyst í vinnubrögðum VM frá því að ég tók við í þessum málum. Formaður hefur ekki greitt reikninga né sinnt bókhaldi. Mér þykir bara leitt að hann skuli ýja að því að starfsfólk félagsins séu að gera eitthvað sem er ólöglegt. Auk þessu erum við með Ernst og Young sem endurskoðendur og förum eftir öllum ráðleggingum þeirra.“

„Þegar er farið út í svona ásakanir þá er þetta komið út í leðjuslag. Ég vil helst bara tala um það sem við erum að gera og hvernig við ætlum að gera félagið sterkara inn í framtíðina,“ segir Guðmundur Helgi. „Mér finnst leitt að farin sé þessi leið.“

• Blogga um frétt