Matvælastofnun ósammála Hval hf.
Matvælastofnun (MAST) segir að engar tilkynningar hafi borist frá Hval hf. um að skortur á fullgildu leyfi hamlaði veiðum og vinnslu.
Í viðtali í Morgunblaðinu á miðvikudag sagði Kristján Loftsson framkvæmdastjóri Hvals hf. að á árunum 2019-2021 hefðu veiðar legið niðri af hálfu fyrirtækisins vegna skorts á leyfi frá MAST.
Í tilkynningu frá MAST segir að hefðbundin útgáfa starfsleyfa til matvælavinnslu byggist á skilgreindu verklagi þar sem fyrst er gefið út skilyrt starfsleyfi til þriggja mánaða í kjölfar fyrstu skoðunar á vinnslu og gögnum sem eru fyrir hendi. Að þeim tíma liðnum er áætlað að fara í aðra úttekt, skilyrði sannreynd og fullgilt leyfi gefið út.
Þá segir að í seinni úttekt á Hval hf. hafi komið í ljós að ákveðin gögn vantaði í tengslum við innra eftirlit og áhættumat, svo ekki var hægt að gefa út fullgilt starfsleyfi.
Segja gögn ekki fullnægjandi
Í viðtali við Morgunblaðið rak Kristján sína hlið málsins. Hvalur hf. fékk bráðabirgðaleyfi í júní árið 2018. Forsvarsmenn Hvals hf. óskuðu eftir fullnaðarúttekt 4. september 2018 til þess að hægt væri að veita félaginu óskilyrt vinnsluleyfi.
Á næstu tveimur árum óskaði MAST síðan eftir frekari gögnum í nokkur skipti sem Hvalur hf. útvegaði eins fljótt og auðið var að sögn Kristjáns.
Í tilkynningu MAST segir hins vegar að fullnægjandi gögn hafi ekki borist fyrr en haustið 2021 og var þá gefið út fullgilt leyfi.
Hvalur hf. kærði óhóflegan drátt á málsmeðferð til sjávarútvegsráðherra en málinu var vísað frá þar sem leyfið hafði þá verið gefið út. Matvælaráðuneytið ákvað 15. febrúar 2022 að endurupptaka stjórnsýslukæruna.