Stöðug kolmunnaveiði við Færeyjar

Veiðar á kolmunna hafa gengið vel síðan veiðar hófust fyrir sunnan og suðaustan Færeyjar um miðjan mars. Síðan þá hefur verið jöfn og góð veiði og hráefnið gott, að sögn útgerðarmanna sem rætt var við í gær. Skipin voru í gær að veiðum í færeyskri lögsögu og auk íslenskra skipa voru þar einnig rússnesk, færeysk og grænlensk skip.

Í gær var búið að landa tæplega 119 þúsund tonnum samkvæmt yfirliti á vef Fiskistofu, en talsvert er í skipunum og óskráð úr nýlegum löndunarskýrslum. Alls er íslenskum skipum heimilt að veiða tæp 175 þúsund tonn af kolmunna í ár. Mörg skipanna eru um það bil að ljúka kolmunnavertíð. Líklegt er að útgerðir fari að huga að veiðum á makríl um eða upp úr 20. júní.

Auk íslensku skipanna hafa færeysku skipin Arctic Voyager, Katrín Jóhanna og Götunes landað á Fáskrúðsfirði og grænlenska skipið Tasiilaq. Þá landaði Fagraberg frá Færeyjum á Eskifirði.