Upp hafa komið upp þrjú mál á undanförnum tólf mánuðum um borð í tveimur veiðiskipum þar sem eftirlitsmenn á vegum Fiskistofu hafa orðið fyrir áreiti eða óviðeigandi framkomu er þeir sinna störfum sínum.
Þetta kemur fram í svari stofnunarinnar við fyrirspurn Morgunblaðsins. Málin eru sögð hafa verið „leyst með formlegum hætti“ og að farið hafi verið fram á úrbætur.
Áður hafa 200 mílur fjallað um hvernig áreiti í garða veiðieftirlitsmanna í Noregi sé vaxandi vandamál og hefur þarlend fiskistofa, Fiskeridirektoratet, kært kynferðislegt áreiti til lögreglu.
Oft sömu aðilar
„Einstaka aðilar (oft þeir sömu) hafa verið með ónot við eftirlitsmenn á meðan löndun afla stendur yfir en benda má á að Fiskistofa lítur alvarlega á það þegar slík mál koma upp og lítur á það sem hindrun í starfi þegar áreiti og slæm samskipti koma upp,“ segir í svari Fiskistofu.
Þá er eðli þess áreitis sem starfsmenn stofnunarinnar verða fyrir sagt geta verið gagnrýni á störf eftirlitsmanna og þras yfir því að fara þurfi að reglum. Þá geta meðal annars verið uppi ásakanir um einelti Fiskistofu í garð þess sem sætir eftirliti og ólund vegna brota sem einstaklingar hafa verið staðnir að.
Við spurningu um áhrif áreitis á störf eftirlitsmanan svarar Fiskistofa: „Ef þrúgandi samskipti eiga sér stað um borð í veiðiskipi getur það valdið auknu álagi þar sem veiðiferð stendur yfir í marga daga. Síendurtekið áreiti getur haft áhrif á líðan starfsmanna og má benda á að Fiskistofa sá sig knúna til að setja út fréttatilkynningu til að minna viðskiptavini á að sína háttvísi í samskiptum.“
Enginn tilkynning hefur borist til stjórnenda Fiskistofu um kynferðislega áreitni síðustu 12 mánuði.