Bjóða 7.951 tonn af makríl í skiptum fyrir þorsk
Fiskistofa hefur óskað eftir aflamarki í þorski fyrir 6.951 tonn af makríl og 20,8 tonn af rækju við Snæfellsnes. Fram kemur í tilkynningu á vef stofnunarinnar að við mat tilboða sé stuðst við meðalverð aflamarks síðasta mánaðar, en viðmiðunarverð síðasta mánaðar fyrir þorsk var 398,24 krónur á kíló.
Íslensku uppsjávarskipunum gekk heldur illa að ná þeim afla sem úthlutaðar heimildir gerðu ráð fyrir. Auk þess hefur aflamark í þorski verið af skornum skammti á fiskveiðiárinu og enn minna á því næsta. Það er því ekki talið líklegt að makrílkvóti þyki eftirsóknarverður ef leggja þarf fram þorskkvóta í staðinn.
Opnað var fyrir tilboð í gær og er tilboðsfrestur til þriðjudagsins 28. júní, en ekki er gerð krafa um lágmarkstilboð.
Fyrir hverja úthlutun aflaheimilda á tilboðsmarkaði ber að greiða 12.900 krónur samkvæmt gjaldskrá Fiskistofu. Þannig ber tilboðsgjafa að greiða þá upphæð fyrir hvert tilboð sem tekið er að fullu eða að hluta.