Þrusuvika á Vestmannaey að sögn skipstjóra
„Þetta var bara þrusuvika hjá okkur og við getum ekki kvartað. Í báðum túrunum tókum við sama veiðirúntinn. Það var Víkin, Höfðinn og Mýragrunn,“ segir Birgir Þór Sverrisson, skipstjóri á Vestmannaey VE, í færslu á vef Síldarvinnslunnar. Skipið landaði fullfermi á sunnudag og svo aftur í gær.
„Aflinn var blandaður. Þorskur hafði vinninginn í fyrri túrnum en ýsan í þeim síðari. Veðrið var ekkert sérstakt og það er varla hægt að tala um sumarveður. Við fengum bæði norðan- og vestanbrælu. Nú styttist í slipp hjá okkur og þá munu menn njóta frísins. Við förum í slipp eftir um það bil hálfan mánuð,“ segir Birgir.
Samkvæmt áætlunum mun Bergur VE (áður Bergey VE) halda til veiða í fyrsta sinn undir nýju nafni síðdegis á morgun, en skipið siglir til Vestmannaeyja frá Reykjavík í dag. Þar hefur það verið í slipp þar sem meðal annars var skipt um nafn á því.