Ráðgjöf Hafró staðfesti áhyggjur SFS

Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi (SFS), segir að stjórnvöld tryggi Hafrannsóknastofnun ekki þann mannauð og fjármuni sem hún þarf til þess að geta stundað vandaðar hafrannsóknir. 

„Sá mikli niðurskurður sem orðið hefur á vöktun nytjastofna á undanförnum árum er jafnframt umhugsunarefni. Hann getur leitt til aukinnar óvissu um afrakstursgetu stofna og þar með varkárari nýtingar en ella væri hægt að viðhafa. Nýkynnt ráðgjöf Hafrannsóknastofnunar fyrir komandi fiskveiðiár er því miður vísbending um að áhyggjur SFS hafi verið réttmætar og brýnt er að bæta úr,“ skrifar hún á vef samtakanna.

Hafrannsóknastofnun gaf nýverið út árlega ráðgjöf til stjórnvalda um ástand nytjastofna í hafinu í kringum Ísland, eða á mannamáli, líkt og Heiðrún ritar, hve stór kvótinn verður á næsta fiskiári.

• Blogga um frétt