78% sæbjúgnakvótans til þriggja félaga

Hafnarnes Ver ehf. á Þorlákshöfn verður með mesta sæbjúgnakvóta á landinu eða 36,62%, verði aflaheimildum úthlutað í samræmi við útreikninga Fiskistofu á veiðireynslu. Næstmesta sæbjúgnakvóta fær Aurora Seafood ehf. eða 24,88% og Völ ehf. fær 16,77%.

Eru þannig þrjú félög með 78% sæbjúgnakvótans.

Þann 15. júní síðastliðinn samþykkti Alþingi frumvarp Svandísar Svavarsdóttur, matvælaráðherra, um um breytingu á lögum um stjórn fiskveiða með tilliti til veiðistjórn sandkola og hryggleysingja.

Með breytingunni var ákveðið að setja skipum aflahlutdeild í sæbjúgum á skipt niður á veiðisvæði miðað við veiðireynslu á fiskveiðiárunum 2018/2019, 2019/2020 og 2020/2021. Á grundvelli upplýsinga um landanir hefur Fiskistofa reiknað áætlaða aflahlutdeild útgerða.

Veiðisvæðunum er skipt í vestursvæði og austursvæði. Hafnarnes ver ehf. er samkvæmt útreikningum Fiskistofu með 39,33% kvótans á vestursvæði og 33,9% á austursvæði, en Aurora Seafood ehf. er með 24,29% á vestursvæði og 25,47% á austursvæði.

Völ ehf. er með 12,62% á vestursvæði en 20,92% á austursvæði. Ebbi-útgerð ehf. er aðeins á vestursvæði og hefur þar 17,97%, en Emel ehf. er bara á austursvæði og hefur þar 10,77%.

• Blogga um frétt