Lokun lögsögu ástæða uppsagna?
Vakið hefur töluverða athygli að Útgerðarfélag Reykjavíkur hf. (ÚR) hafi ákveðið að losa sig við Sólborgu RE, þar sem innan við ár er síðan félagið festi kaup á skipinu.
Þetta kemur fram í Morgunblaðinu í dag, þriðjudag.
Við kaupin var sagt frá áformum um að breyta og endurnýja vinnsludekk skipsins með hátæknibúnaði í fremsta flokki. Heildarfjárfestingin var áætluð um þrír milljarðar króna.
ÚR keypti skipið af Arctic Prime Fisheries á Grænlandi sumarið 2021. Það þótti mikill kostur að skipið væri í efsta ísklassa sem fiskiskip eru byggð fyrir, enda var tilgangurinn með kaupunum meðal annars að eignast skip sem myndi stunda veiðar í Barentshafi, sérstaklega á ufsa og karfa. Alls voru 48 ráðnir á Sólborgu og var þeim skipt í tvær 24 manna áhafnir.
Þeim hefur öllum verið sagt upp en Runólfur Viðar Guðmundsson, framkvæmdastjóri ÚR, sagði við Morgunblaðið í gær að nú sé verið að skoða kaup á öðru skipi.
Lokuð lögsaga
Ekki er ljóst nákvæmlega hver ástæðan er fyrir því að skoða kaup á nýju skipi í stað Sólborgar en reynslumikill skipstjóri, sem rætt hefur verið við, segir útgerðir sem stunda veiðar í Barentshafi hafi þurft að endurskipuleggja veiðarnar að undanförnu þar sem dregið hefur verulega úr aflaheimildum í Barentshafi. Í fyrsta lagi hefur þorskkvóti í Barentshafi verið skorinn niður um ríflega 20% tvö ár í röð á grundvelli ráðgjafar vísindamanna hjá Alþjóðahafrannsóknaráðinu (ICES) og hefur einnig orðið niðurskurður í ýsukvóta. Vonir, um að auknar heimildir í ufsa myndu vega á móti þessari þróun, hafa orðið að engu, þar sem lokað hefur verið á stóran hluta Barentshafsveiðanna sem eiga sér stað í rússneskri lögsögu.
Sólborg, sem átti að nýta aflaheimildir í Barentshafi, sat því í vetur uppi með mun færri verkefni en áætlað var og hefur aðallega landað lúðu í vor og í sumar. Eftir því sem blaðamaður kemst næst, mun áhöfnin starfa áfram þar til endanleg ákvörðun hefur verið tekin um hvernig skuli leysa úr stöðunni.
Uppsjávarskip?
Ekki liggur fyrir hvers konar skipi ÚR leitar að en á Sólborgu voru skráðar þó nokkrar heimildir í loðnu þegar Brim fór yfir kvótaþakið í vetur. Frystitogarinn veiðir þó ekki uppsjávartegundir og hafa heyrst vangaveltur um það hvort ÚR hafi áhuga á að eignast uppsjávarskip.
