Sjö mánuði að vinna úr engu um túnfiskveiðar

Matvælaráðuneytið var sjö mánuði að vinna úr umsögnum um breytingar á lögum um stjórn fiskveiða í tengslum við veiðar á bláuggatúnfiski. Engar umsagnir bárust vegna málsins og birtust niðurstöður tveimur mánuðum eftir að það var samþykkt á Alþingi.

Þann fimmta janúar síðastliðinn var birt í samráðsgátt stjórnvalda kynning á áformum um breytingar á lögum um stjórn fiskveiða sem ætlað var að skapa bættar forsendur þess að íslensk skip gætu stundað túnfiskveiðar. Lokað var fyrir umsagnir 18. janúar og hófst þá úrvinnsla umsagna, að því er fram kemur í skráningu samráðsgáttarinnar. Var þá fjallað um að engar umsagnir hefðu borist.

Niðurstöður samráðsins voru hins vegar birtar 8. ágúst og vakti það athygli fyrir þær sakir að frumvarp er snýr að fyrrnefndum breytingum var samþykkt á Alþingi 15. júní, eða tæplega tveimur mánuðum fyrr.

Frétt af mbl.is

Engar umsagnir bárust um túnfiskveiðar

Ekki einstakt

Þetta er ekki í fyrsta sinn sem atvik af þessum toga eiga sér stað í skráningu ráðuneyta í samráðsgáttinni. Fjallaði Morgunblaðið um það fyrir um ári að á þriðja hundrað mála væru komin úr samráði en biðu þess að niðurstöður yrðu birtar, þar á meðal 9 mál frá árinu 2018. Í fjölda tilfella hefðu lög og reglugerðir tekið gildi án þess að niðurstöður samráðsins hefðu verið birtar. Í kjölfar umfjöllunarinnar voru 79 mál afgreidd á fimm dögum.

Alls eru nú 170 mál þar sem samráði er lokið og bíða nú þess að niðurstöður verða birtar.

Frétt af mbl.is

Afgreiddu 79 mál á fáum dögum

• Blogga um frétt