Lönduðu samningi upp á rúman milljarð

Skaginn 3X hefur undirritað samning við norsku útgerðina Bluewild um uppsetningu vinnslulínu um borð í hátæknitogara og nemur verðmæti samningsins rúmlega milljarð króna, að því er fram kemur í fréttatilkynningu frá Skaganum 3X.

„Samningurinn markar tímamót fyrir okkur,“ segir Ragnar A. Guðmundsson, yfirmaður sölumála Skagans 3X fyrir Skandínavíu og Evrópu, í tilkynningunni.

„Við höfum unnið náið með Bluewild teyminu síðastliðin tvö ár. Ótal fundir og tilraunir skiluðu þessum árangri og við höfum þróað nýja og spennandi kerfislausn sem samrýmist virkilega vel stefnu þeirra.“

Ulstein Design & Solutions AS hönnuðu togarann og er hann smíðaður af Westcon skipasmíðastöðinni í Noregi og koma félögin einnig að hönnun og smíði kerfanna um borð, en auk þeirra koma að verkefninu CFlow Systems, PTG og nú Skaginn 3X.

Lifandi fyrir neðan sjólínu

Togaranum er lýst sem „byltingakenndum“ í tilkynningunni og er meðal annars bent á að aflinn er fluttur beint í vatnsfyllta birgðatanka fyrir neðan sjólínu þegar hann kemur um borð, þar sem hann er geymdur lifandi áður en hann er fluttur í vinnslu.

„Aflinn er færður á efra verksmiðjudekkið með yfirþrýstingslosun sem kemur í veg fyrir hið dæmigerða tjón sem getur orðið við notkun annars konar dælingar. Vinnslukerfi Skaginn 3X tekur þar við og mun vinna fiskinn í flök og bita. Einnig verður heildstæð rækjulína um borð sem mun vinna soðna og lausfrysta rækju sem og frysta iðnaðarrækju til frekari framleiðslu í landi.“

Nýr togari Bluewild í Noregi mun geyma lifandi fisk í vatnsfylltum birgðatönkum. Ljósmynd/Skaginn 3X

Hugmyndafræðin á bak við togarann er nefnd ECOFIVE og er hugsuð sem leið til að framleiða vörur í hæsta gæðaflokki með sem minnstum orkukostnaði og er verkefnið tilnefnt til nýsköpunarverðlauna Nor-Fishing Foundation 2022.

„Það er ótrúlegt tækifæri að vera valinn til að afhenda lausn í nýsköpunarverkefni eins og ECOFIVE,“ segir Ragnar. „ Kerfislausn okkar fellur ótrúlega vel að kröfum kúnnans um sjálfbærar veiðar, hámarks nýtingu og aukið verðmæti bæði afurða og aukaafurða.“

• Blogga um frétt