Danskt varðskip í slipp á Akureyri

Danska varðskipið Lauge Koch er nú í Slippnum á Akureyri. Verið er að gera við neðansjávarsiglingartæki sem skemmdust þegar skipið var á siglingu við Grænland.

Varðskipið, sem er tæpir 72 metrar á lengd, heitir eftir þekktum dönskum pólfara en það er sérstaklega búið til siglinga á norðurslóðum þótt það sé einnig nýtt til annarra verkefna. Að sögn Davíðs Arnar Benediktssonar, verkefnastjóra hjá Slippnum, er ekki algengt að dönsk varðskip komi þangað til viðgerðar en það muni þó hafa komið fyrir áður.

Davíð sagði, að verkefnastaðan hjá Slippnum væri ágæt og nóg verkefni væru þar fram undan næstu mánuði.