„Hafið er stórt og stórt svæði til að leita“
Setja bókamerki
„Eins og staðan er núna engin veiði. Það var leiðindaveður hérna og hefur engin veiði verið síðan,“ segir Albert Sveinsson, skipstjóri á Víkingi AK-100, um gang makrílveiðanna. Uppsjávarskipið er statt 149 sjómílur aust-norðaustur af Langanesi í leit að makríl er blaðamaður slær á þráðinn.
„Veðrið lagaðist í gær morgun og einhverjir hafa kastað og fengið mjög lítið. Þetta tekur oft smá tíma að jafna sig eftir svona leiðindaveður. Það þarf að vera gott veður fyrir svona veiðiskap,“ útskýrir Albert.
En er skipstjórinn sannfærður um að fiskurinn sé á svæðinu? „Það er fiskur að þvælast en það er spurning hvar hann gefur færi á sér, svo er líka komið fram á þennan árstíma og þá hefur oft verið lítið eða ekkert. En það hefur heyrst af makríl út af Norðurlandi, einhverjir krókabátar að ná makríl. Það er fiskur hérna enn þá en hann er bara svo dyntóttur að hann birtist og eins og eins og hendi sé veifað hverfur hann aftur. Við höldum enn þá í vonina.“
Makrílvertíðin hefur reynst áskorun fyrir marga og eiga íslensku uppsjávarskipin enn eftir um 40 þúsund tonn óveidd, eða rúmlega fimmtungur úthlutaðra heimilda í tegundinni. Aðeins er heimilt að færa 15% af úthlutuðum heimildum milli ára.
Allir að leita að makríl
Albert segir ekki bara íslensku skipin sigla um í makrílleit. „Alls staðar er verið að leita. Það eru Norðmenn við íslensku línuna í Jan Mayen-lögsögunni að leita og þeir hafa ekki stoppað í neinu. Færeyingarnir eru að leita. Það eru allir að leita. Einhvern veginn er þetta þannig að þetta birtist alls staðar á sama tíma og hverfur á sama tíma. Hafið er stórt og því stórt svæði til að leita. Þetta eru oft langar siglingar milli svæða.“
Víkingur er gerður út af Brim, en það eru einnig Venus NS og Svanur RE. Albert útskýrir að skipin hafa verið í miklu samstrafi um veiðarnar. „Við byrjuðum túrinn á að setja um borð í Venus RE sem fór í land með um 1.500 tonn og svo settum við í Svan RE sem er ný kominn í land með um þúsund tonn.“ Bæði skipin kom til löndunar á Vopnafirði.
„Við erum að fara að byrja að setja í okkur ef við finnum eitthvað. Ég vona bara að það gerist,“ segir skipstjórinn og hlær. „Það voru tveir bátar að kasta suður af okkur, en það er spurning hvort það var makríll sem þeir köstuðu í.“
Vélsleðaslys: Þyrlan kölluð út á mesta forgangi
Hernaðaraðstoð samþykkt – Vopnasendingar í vikunni
Veiting hvalveiðileyfis ekki brot á EES-samningi
„Skýr skilaboð til Seðlabankans“
„Þetta náttúrulega endar með ósköpum“
Vona að Orkustofnun veiti ekki virkjunarleyfi
„Hvílir mikil leynd yfir þessu öllu“