Lönduðu afla fyrir 2 milljarða

Síldarvertíðin er komin á fullt hjá áhöfninni á Hoffelli SU-80, en skipið lauk nýverið makrílvertíð og hefur skipið (ásamt fyrirennara sínum með sama nafn) náð að landa 36 þúsund tonnum á árinu. Verðmæti aflans var um tveir milljarðar króna.

Hoffellið kom til hafnar á Fáskrúðsfirði með síðasta makrílfarminn 15. september síðastliðinn og var hann um þúsund tonn. Ekki var þó stoppað lengi enda síldarvertíðin hafin og kom skipið á ný til löndunar á þriðjudag, þá með 450 tonn af síld.

Fram kemur á vef Loðnuvinnslunnar að síldin hafi farið í söltun fyrir erlenda markaði og frystingu á beitu fyrir Sandfell SU-75 og Hafrafell SU-65.

Síldin er meðal annars fryst sem beita fyrir Sandfell. mbl.is/Hafþór Hreiðarsson

Krókabátarnir tveir hafa verið með aflahæstu bátum landsins. Samkvæmt aflatölum Fiskistofu náði Sandfell, sem Loðnuvinnslan gerir út, að landa rúmlega 101 tonni í ágúst og Hafrafell tæplega 94 tonnum í sama mánuði.

Skipin þrjú eru nú öll á veiðum austur af landinu, en togarinn Ljósafell SU-70 sem Loðnuvinnslan gerir einnig út er á miðunum suðaustur af landinu.

Uppfært klukkan 11:00: fyrr var rætt um skipið Hoffell í eintölu, en rétt er að aflinn er bæði gamla Hoffell og nýja Hoffell sem afhent var í sumar. Fréttin hefur verið leiðrétt með tilliti til þess.

• Blogga um frétt