Mokveiði á Steinunni rétt við Ólafsvík

Dragnótabáturinn Steinunn SH frá Ólafsvík lenti heldur betur í mokveiði rétt undan Ólafsvík í gær. Köstuðu skipverjar dragnótinni aðeins þrisvar sinnum og var aflinn yfir 55 tonn að sögn þeirra.

Talið er víst að áhöfnin sé ekki óvön svona aflabrögðum. „Það er nóg af þorski í sjónum og mikið af sandsíli sem fiskurinn sækist í,“ útskýrðu skipverjar kampakátir er fréttaritari mætti á bryggjuna. Voru þeir önnum kafnir við að landa aflanum.

Meðalverð á þorski hefur verið hátt svo þetta var góður dagur, að sögn þeirra Sumarliða Kristmundssonar og Ingólfs Aðalsteinssonar.

Einnig fór dragnótabáturinn Esjar SH frá Rifi á sjó um hádegið í gær og hafði þegar landað 21 tonni í gærkvöldi og hélt síðan aftur á veiðar en mjög stutt er á miðin.

Oddur Brynjarsson í brúnni. Hann er nýtekinn við skipstjórn af föður sínum Brynjari Kristmundssyni. mbl.is/Alfons

mbl.is/Alfons

• Blogga um frétt