Margrét Kristín Pétursdóttir kosin formaður KÍS

Margrét Kristín Pétursdóttir, forstöðumaður gæðamála hjá Vísi í Grindavík, var kjörin nýr formaður Félags kvenna í sjávarútvegi, KÍS, á aðalfundi félagsins sem fram fór í húsakynnum Háskólans á Akureyri á mánudag.

Margrét tekur við formennsku af Agnesi Guðmundsdóttur, sölustjóra Icelandic Asia, en hún hefur gegnt embættinu undanfarin fjögur ár.

Tilgangur félagsins er að styrkja og efla konur sem starfa í sjávarútvegi og haftengdri starfsemi. Í því skyni stendur félagið fyrir viðburðum og fræðslu með það að markmiði að efla samstöðu og samstarf kvenna innan sjávarútvegs og haftengdra greina.

Agnes Guðmundsdóttir, fráfarandi formaður KÍS, og Sunneva Ósk Guðmundsdóttir, gæðastjóri ÚA. Ljósmynd/Samherji

Samhliða aðalfundi heimsóttu um sextíu konur í félaginu frystihús Samherja á Dalvík.

„Þessi heimsókn í fiskvinnsluhús Samherja á Dalvík var einmitt liður í þeirri viðleitni að efla samstöðuna meðal kvenna í sjávarútvegi og tengja betur landsbyggðina. Við vorum allar sammála um að þetta nýja fiskvinnsluhús væri til fyrirmyndar, bæði hvað varðar hönnun, aðstöðu starfsfólks og alla hátæknina sem er svo áberandi hvert sem litið er. Húsið er glæsilegur vitnisburður um þá staðreynd að við Íslendingar stöndum afar framarlega í fiskvinnslu á heimsvísu. Íslenskt hugvit er sérlega áberandi í húsinu, sem segir líka sína sögu,“ er haft eftir Agnesi á vef Samherja.

Ljósmynd/Samherji

• Blogga um frétt