Almenningi boðin innsýn í hafrétt

Hafréttarstofnun Íslands og Íslenski sávarklasinn hafa ákveðið að efna til örnámskeiðs í hafrétti fyrir almenning. Fer námskeiðið fram þann 7. október í Húsi sjávarklasans að Grandagarði í Reykjavík, að því er fram kemur í tilkynningu á vef Íslenska sjávarklasans.

Þór Sigfússon, stofnandi Íslenska sjávarklasans, setur námskeiðið, en kennsla er í höndum Tómasar H. Heiðar, varaforseta Alþjóðlega hafréttardómstólsins í Hamborg og forstöðumanns Hafréttarstofnunar, Birgis Hrafns Búasonar, deildarstjóra hafréttarmála í utanríkisráðuneytinu, og Snjólaugar Árnadóttur, lektors við lagadeild HR og forstöðumanns Sjálfbærni- og loftslagsréttarstofnunar.

Fjallað verður meðal annars um hver þáttur Íslendinga í þróun hins nýja hafréttar var á 20. öld, um hvað grunnlínur, innsævi, landhelgi, efnahagslögsaga, landgrunn, úthaf og alþjóðlega hafsbotnasvæðið er og hvaða reglur gilda samkvæmt hafréttarsamningnum og öðrum alþjóðasamningum um fiskveiðar, hvalveiðar, siglingar og lausn deilumála.

Örnámskeið fer fram 7. október. Mynd/Íslenski sjávarklasinn

• Blogga um frétt