Íslendingar hagnist á auðlindaskatti Norðmanna
Setja bókamerki
Leiðtogar í fiskeldisgeiranum telja Ísland hagnast mest á tillögu norsku ríkisstjórnarinnar um auðlindaskatt þar sem hún bætir stöðu Íslands sem framtíðarvaxtarsvæðis greinarinnar. Þetta er meðal þess sem fram kom á fjárfestaþingi miðilsins IntraFish sem fram fór í London á dögunum.
„Íslendingar eru reiðubúnir til að gera það sem þarf til að byggja upp atvinnugreinar,“ sagði Asle Rønning, fráfarandi framkvæmdastjóri norska fiskeldisfyrirtækisins Måsøval AS, á málþinginu. Måsøval AS fer með meirihluta hlutafjár í eignarhaldsfélaginu Ice Fish Farm AS, en dótturfélag þess rekur mestallt fiskeldi á Austfjörðum.
Norska ríkisstjórnin tilkynnti 28. september síðastliðinn um þau áform sín að leggja 40% auðlindaskatt á sjókvíaeldi í Noregi. Í kjölfarið hrundi gengi hlutabréfa í fiskeldisfyrirtækjum sem skráð eru í kauphöllina í Osló.
500 þúsund tonn á Íslandi
Rønning sagðist á málþinginu telja framleiðslugetu Íslands vera að minnsta kosti 500 þúsund tonn af eldislaxi.
Óljóst er hvernig hann komst að þeirri niðurstöðu, en burðarþol í öllum þeim fjörðum þar sem heimilt er að stunda sjókvíaeldi var samanlagt 144.500 tonn árið 2020, að því er fram kemur í skýrslu um stöðu og horfur í íslenskum sjávarútvegi og fiskeldi frá árinu 2021.
Þá nam hámarkslífmassi í nýju áhættumati Hafrannsóknastofnunar fyrir þessa firði 106.500 tonnum.
Mun meiri lífmassa er þó hægt að koma í sjókvíar ef heimilað verður að ala fisk innan þeirra svæða sem nú eru friðuð frá slíkri starfsemi. Nú á sér stað töluverð uppbygging í landeldi en heldur langt er í land þar til sá rekstur getur skilað fleiri hundruð þúsund tonnum.
Engin sjáanleg virkni í nótt
Úrlausnir á næstu dögum
Eldgosinu er lokið
Stimplum stráka ólæsa og uppnefnum þá í sömu andrá
Stórbættur árangur barna
Segir Vegagerðina ekki hlaupast undan ábyrgð
Riftunin lögmæt – Stórfelldar vanefndir