Tjón í vélarrými skipsins

„Staðan er bara þannig að varðskipið Þór kom að flutningsskipinu um kvöldmatalreytið og taug var komið á milli skipanna þannig að Þór er með skipið í togi á leið til Reykjavíkur. Það er gert ráð fyrir því að varðskipið verði komið til hafnar um níuleytið,“ segir Ásgeir Erlendsson, upplýsingafulltrúi Landhelgisgæslunnar, um aðgerðir Landhelgisgæslunnar í kjölfar þess að sprenging varð í vélarrúmi flutningsskips sem var á leið til Íslands.

Flutningsskipið, sem heitir EF AVA, var statt 25 sjómílum suðuaustur af Grindavík þegar fyrsta tilkynning barst Landhelgisgæslunni. 

„Fyrsta tilkynning hljóðaði þannig að það væri eldur um borð í skipinu,“ segir hann í samtali við Morgunblaðið í gær. Í kjölfarið voru tvær þyrlur Landhelgisgæslunnar ræstar út, en í seinni þyrlunni voru fimm reykkafarar frá slökkviliðinu.

„Fljótlega bárust Landhelgisgæslunni að þetta hafi verið sprenging í vélarrúminu og að það væri töluverður reykur. Eftir að þyrlurnar voru komnar á staðinn þá var ljóst að áhöfnin væri búin að ná tökum á ástandinu. Þá var allt viðbragð nema varðskipið kallað til baka.“

Frétt af mbl.is

Tvær þyrlur kallaðar út vegna elds í flutningaskipi

Frekar mikið viðbragð en lítið

Að sögn Ásgeirs er viðbragð ávallt mikið þegar tilkynning um eld um borð í skipum berst Landhelgisgæslunni.

„Við viljum frekar hafa mikið viðbragð og draga úr því í staðinn fyrir að þurfa að bæta í, því við tökum því mjög alvarlega ef tilkynning um eld berst okkur.“

Edda Rut Björnsdóttir, framkvæmdastjóri Mannauðs- og samskiptasviðs Eimskips, segir í samtali við mbl.is að eitthvað tjón hafi orðið í vélarrými skipsins.

„Það varð ekkert tjón á farmi en ljóst að eitthvað tjón er í vélarrýminu en það á eftir að meta það.“

Edda Rut Björnsdóttir, framkvæmdastjóri Mannauðs- og samskiptasviðs Eimskips. mbl.is/Árni Sæberg