Varar við ofveiði á Norður-Atlantshafi

„Það hlýtur að vera tímabært að einhver taki forystu og leiði þjóðirnar að samkomulagi. Allir myndu hagnast á því, bæði fiskstofnarnir, vistkerfi hafsins, sjávarútvegurinn og neytandinn!“ segir Gísli Gíslason, svæðisstjóri Marine Stewardship Council í Norður-Atlantshafi, í aðsendri grein sem birt var í Morgunblaðinu í gær.

Hann segir að yfir 27% af nytjastofnum í Norður-Atlantshafi hafi í skýrslu FAO verið skilgreindir ofveiddir árið 2019, sem var viðbót upp á tæp 7% frá árinu 2017.

Útbreiðsla kolmunna makríls og norsk-íslenskrar síldar. Engir samningar eru til staðar um skiptingu aflahlutdeildar milli strandrríkjanna. Kort/mbl.is

Vekur Gísli athygli á að svokölluð strandríki – Evrópusambandið, Noregur, Ísland, Rússland, Færeyjar, Grænland og Bretland – hafi enn ekki komist að samkomulagi um veiði á deilistofnunum kolmunna, makríl og norsk-íslenskri síld og að stundaðar séu veiðar langt umfram vísindalega ráðgjöf.

Minnir hann á að við lok sjöunda áratugs síðustu aldar hafi stærsti síldarstofn heims hrunið – norsk-íslenska vorgotssíldin – vegna ofveiði. „Aðrir stofnar eins og t.d. Norðursjávarsíldin og makríllinn minnkuðu einnig. Allt var þetta afleiðing af margra ára ofveiði.“

Greinina má lesa í heild sinni hér.