Fisktækniskólinn verðlaunaður af Norðurlandaráði

Fisktækniskóli Íslands hlaut Nordplus Aurora menntaverðlaun Norðurlandaráðs árið 2022 vegna verkefnisins „Fisheries training for a Nordic future“ sem er til þriggja ára og hefur að markmiði að mynda samstarfsnet allra sérskóla á Norðurlöndum á sviði veiða, vinnslu og fiskeldis.

Ólafur Jón Arnbjörnsson, skólameistari Fisktækniskóla Íslands, segir í færslu á vef skólans vegferðina hafa hafist fyrir meira en áratug. „Þegar við fengum stuðning Vestnorrænu skrifstofunnar í Færeyjum (NORA) til að tengja saman skóla í Grænlandi, Íslandi, Færeyjum og vestanverðum Noregi. Við víkkuðum síðan út samstarfið hægt og rólega og eru nú alls níu skólar í samstarfsnetinu frá öllum Norðurlöndum […] nema  Svíþjóð, en við erum að vinna að því að bæta þeim við í næstu lotu.“

Í færslunni segir að Nordplus Aurora verðlaunin sé veitt árlega því verkefni á sviði leik-, grunn- og framhaldsskóla, sem talið er hafa skarað fram úr.

Ólafur Jón Arnbjörnsson, skólameistari Fisktækniskóla Íslands, með viðurkenninguna. Ljósmynd/Fisktækniskóli Íslands

Samstarf skilað árangri

„Það þarf vart að nefna hversu mikilvægt það var fyrir okkur - sem voru að undirbúa stofnun skólans í Grindavík – að hafa aðgang að reynslu nágranna okkar og ekki síður að fá aðgang að öllu því náms- og kennsluefni sem þessir skólar höfðu, sem var jú afar takmarkað hér þegar við vorum að fara af stað fyrir rúmum 12 árum. Við nutum sérstaklega góðs af þessu framan af,“ segir Ólafur og vísar sérstaklega til fiskeldis.

„En síðustu árin höfum við geta stutt samstarfsaðila okkar á þeim sviðum sem við höfum haft yfirburði, svo sem á sviði vinnslu- og veiðarfæratækni. Þá höfum við notið góðs af því að nemendur okkar hafa fengið verklega þjálfun hjá vinaskólum okkar – við aðstæður og búnað sem við höfum ekki haft efni á að koma okkur upp.“

Frétt af mbl.is

Auknar kröfur um þekkingu starfsmanna

Fram kemur að  Norræna ráðherranefndin hefur í tvígang styrkt verkefnið undir merkjum Nordplus. Fyrst árið 2016, en einnig í þessum hluta verkefnisins (2018-2022) sem lýkur formlega nú í desember. „Ég reikna fastlega með að við – hópurinn - komum til með sækja um að nýju og hættum ekki fyrr en allir verknámsskólar á sviði veiða, vinnslu og fiskeldis á Norðurlöndum verða komnir í samstarfsnetið,“ segir Ólafur.

Grundvöllur annarra góðra verka

Hann bendir á að Norðmenn standi afar vel að baki sínum þrettán fisktækniskólum og hafa flestir skólarnir bæði skólaskip og veiðikvóta auk aðstöðu til verklegrar kennslu. „En þó svo skólarnir standi misvel að vígi hvað þetta varðar, þá eiga þeir það flestir sameiginlegt að vera frekar litlir sérskólar og oftast tengdir minni sjávarbyggðum.“

„Faglega, eigum við einnig mjög mikið sameiginlegt. Þetta er jú Norður Atlantshafið! Þetta er sami fiskurinn, sömu veiðarfæri, vinnsluaðferðir og markaðir og fiskeldið mjög svipað. Við glímum einnig við sömu vandamálin hvað varðar nýliðun og áhuga ungs fólks á námi og starfi innan bláa hagkerfisins. Við eigum, hvað þetta varðar, meira sameiginlegt innbyrðis og yfir landamærin, en með öðrum framhaldsskólum í heimalandinu. Með því að tengja skólana saman „svona í toppnum“ hefur okkur tekist að tala sterkari röddu og hafa ótal „spin-off“ verkefni farið af stað í skjóli samstarfsnetsins síðustu 10 árin,“ útskýrir skólameistarinn.

Frétt af mbl.is

Aldrei fleiri útskrifast úr Fisktækniskólanum

• Blogga um frétt