„Bölvuð ótíð alla veiðiferðina“

Falleg 270 gramma síld fékkst í síðasta síldartúr Barkar NK, að mati Hjörvars Hjálmarssonar, skipstjóra á Berki. Talið er að um sé að ræða síðustu síldina sem tekin verður til manneldisvinnslu í fiskiðjuveri Síldarvinnslunnar í ár.

„Það var bölvuð ótíð alla veiðiferðina og við enduðum hana í 30 metra vindi,“ segir Hjörvar í færslu á vef Síldarvinnslunnar, en Börkur kom til hafnar í Neskaupstað með 1.030 tonn af síld í morgun sem að sögn skipstjórans fékkst í fjórum holum í Kolluálnum. Þá hafi verið togað í einhverja fjóra til sex tíma í hverju holi.

„Nú fara menn að hugsa um annað en síld. Það á eftir að veiða svolítinn kolmunna núna í lok ársins hjá fyrirtækinu en nú er mest hugsað um loðnuna. Við erum bjartsýnir hvað varðar aukinn loðnukvóta. Það hefur verið góð fylgni á milli ungloðnumælinga og kvóta og mælingarnar eiga að gefa tilefni til bjartsýni hvað varðar kvótaaukningu. Það hlýtur að finnast meiri loðna við frekari leit,“ segir Hjörvar.

• Blogga um frétt