Ekki tryggt að kræklingur sé öruggur til neyslu

Eftirlitsstofnun EFTA (ESA) telur íslensk yfirvöld ekki geta tryggt að kræklingur væri öruggur til neyslu og kallar eftir því að Ísland bæti eftirlit til að koma í veg fyrir að settur sé á markað kræklingur sem getur verið skaðlegur heilsu neytenda. Þetta kemur fram í fréttatilkynningu stofnunarinnar.

Þar er vísað til skýrslu vegna eftirlits með framleiðslu lifandi samloka, einkum kræklings, og kemur skýrslan í kjölfar úttektar sem gerð var á Íslandi frá 30. ágúst til 2. september á þessu ári.

„Markmið úttektarinnar var að leggja mat á innleiðingu og árangur úrbóta íslenskra yfirvalda í kjölfar úttektar sem gerð var af ESA í mars 2019. Sú úttekt lagði mat á heilbrigði eldisdýra og opinbert eftirlit með lifandi samlokum. Í henni komst ESA að þeirri niðurstöðu að Ísland gæti ekki tryggt að kræklingur á markaði væri öruggur til neyslu,“ segir í tilkynningunni.

Þetta er ekki í fyrsta sinn sem ESA setur út á eftirlit með kræklingaframleiðslu hér á landi og var árið 2019 einnig gerð sambærileg úttekt. ESA segir nú að úrbætur sem íslensk yfirvöld hafi gert í kjölfar þeirrar úttektar hafi ekki verið fullnægjandi og er talið að grípa þarf til frekari aðgerða svo neytendum sé ekki seldur kræklingur sem getur verið skaðlegur heilsu.

MAST ekki sammála

Fram kemur í skýrslunni sem vísað er til að Matvælastofnun (MAST) hafi komist að því að einn seljandi hafi sett á markað kræklinga sem vitað var að voru skaðlegir heilsu. Auk þess hafi verið seldir kræklingar af aðila sem ekki hafi haft tilskilin leyfi. Telur ESA ljóst að formlegra eftirlit með þessari sölu sé þörf. MAST hefur fyrir sitt leiti andmælt þessari niðurstöðu ESA og segir gripið hafi verið til viðeigandi aðgerða þegar slíkt á við.

Þá bendir ESA á að greining sýna sem framleiðendur taka, senda MATÍS og MATÍS sendir viðurkenndum rannsóknarstofum m.a. í Svíþjóð og Þýskalandi, hafa ekki gefið fullnægjandi niðurstöður í samræmi við evrópureglugerðir. MAST hefur ekki andmælt þessu en gagnrýndi að í skýrsludrögum að rannsóknastofurnar hefðu verið nafngreindar, nöfnin eru ekki í endanlegri skýrslu.

Skýrsluna má lesa í heild á vef ESA.

• Blogga um frétt