Brim sendir frá sér yfirlýsingu
„Brimi þykir miður hvernig mál fyrrum starfsmanns félagsins hafa þróast en hann var sjómaður um borð á skipi félagsins á sjó úti þegar fréttir bárust af sorglegum atburði á Blönduósi fyrr á árinu þar sem fjölskylduvinir sjómannsins voru fórnarlamb árásar.“
Þetta segir í yfirlýsingu frá Brimi hf., sem barst nú í kvöld í kjölfar umfjöllunar um Boga Theodór Ellertsson sjómann.
Hann sagði farir sínar ekki sléttar eftir að hafa fengið taugaáfall úti á sjó þegar hann fékk fregnir af því að æskuvinur hans lægi milli heims og helju eftir árás á Blönduósi í lok ágúst, þar sem kona hans var myrt.
Röð áfalla dunið á Boga
Bogi sagði útgerðarfélagið ekki hafa tekið mark á tveimur veikindavottorðum lækna í viðtali við RÚV, sem staðfest hefðu taugaáfall, en undanfarin ár hefur röð áfalla dunið á Boga og hann bitið á jaxlinn að sjómanna sið, en þegar árásin var gerð á Blönduósi gat hann ekki meir.
„Brim harmar að verkferlar félagsins hafi brugðist í þessu máli. Mikilvægt er að fyrirtækið sýni starfsfólki og aðstendum þess samúð og skilning við eins erfiðar aðstæður og komu upp í þessu tilviki. Brim mun endurskoða verkferla félagsins og viðbrögð við erfiðum áföllum starfsfólks.
Að öðru leyti mun Brim ekki tjá sig um málefni einstakra starfsmanna félagsins,“ segir enn fremur í yfirlýsingunni, en áður hafði blaðamaður mbl.is reynt að ná sambandi við Guðmund Kristjánsson forstjóra.
