Sjómaðurinn Þröstur Njálsson á Helgu Maríu RE svarar eldhress er blaðamaður slær á þráðinn. Hann er ekki lítið stoltur af sjálfum sér þegar spurt er hvernig hafi tekist að taka skrokkinn í gegn, enda má hann vera hreykinn af því að hafa náð algjörum viðsnúningi í heilsufarinu.

„Ég var orðinn allt of þungur og þurfti að breyta til. Kominn á fertugsaldurinn og komst bókstaflega ekki í sokkana, ég passaði ekki í buxurnar. Ég var kominn í þrjú XL og sagði við sjálfan mig: Þetta bara gengur ekki lengur,“ segir hann.

Ísfiskitogarinn Helga María AK. Ljósmynd/Brim

Í ferli eins og þessu er mikilvægt að gera það sem maður getur gert fremur en að gera ekki neitt, útskýrir Þröstur. „Það er hrikalega erfitt að byrja. Ég hugsaði með mér að ég myndi byrja á að labba tvo kílómetra og var í 26 mínútur að taka þá. Svo hugsaði ég með mér að reyna alltaf að vera aðeins fljótari og aðeins mánuði seinna var ég bara 11 mínútur að ná tveimur kílómetrum. Ég ætlaði að byrja á að taka armbeygjur gat ég ekki tekið þrjár. Ég tók tvær og gafst upp. Svo hugsaði ég að ég myndi taka tíu yfir daginn. Núna þegar ég er úti á sjó eru átta tíma vaktir og ég er að taka 400 armbeygjur á hverri einustu vakt.“

Það geta oft verið erfiðir dagar á sjó og viðurkennir Þröstur að það getur verið freistandi að vera góður við sig eftir krefjandi vinnudag. „Já, það er mjög algengt að menn fara í sjoppuna til að ná sér í nammi og fara í kojuna. Þeir gefa sér rosa mikið frí. Ég gef mér bara ekkert frí, ég fer frekar á æfingu. Ég er með markmið um að vera fimmtugur með six-pack,“ segir Þröstur og hlær.