Fögnuðu komu stærsta brunnbáts á heimsvísu

Færeyingar fögnuðu komu nýjasta skips flotans á laugardag síðastliðinn þegar hinn 109 metra langi Bakkafossur lagði við bryggju á Glyvar. Um er að ræða einn tæknivæddasta og stærsta brunnbát Færeyja og á heimsvísu.

Bakkafossur var smíðaður af Sefine skipasmíðastöðinni í Tyrklandi fyrir færeyska fiskeldisrisan Bakkafrost og getur skipið borið allt að þúsund tonn af lifandi laxfiskum, að þvi er fram kemur í tilkynningu á vef fyrirtækisins.

Bakkafossur er tengiltvinnskip sem búið er fimm dísilvélum og fimm stórum rafhlöðum sem tryggja um það bil 20% betri orkunýtingu. Staðsetning hreyfla á efsta þilfari tryggir jafnframt að skjótt er hægt að breyta skipinu til að hagnýta umhverfisvænni orkugjafa þegar slíkar lausnir koma á markað.

Skipið er búið nýjustu tækni á sviði afsöltunar vatns og getur því framleitt um 6.000 tonn af fersku vatni á sólarhring. „Bakkafossur bætir verulega ferskvatnshreinsunargetu við starfsemi Bakkafrosts í Færeyjum. Að meðhöndla lax með ferskvatni er skilvirk leið til að skola tálkn, endurheimta tálknaheilbrigði og tryggja öflugri og heilbrigðari vöxt. Að auki verður Bakkafossur útbúinn FLS lúsahreinsunarkerfi sem eykur líföryggi í samræmi við sjálfbærnistefnu Bakkafrosts,“ segir á vef fyrirtækisins.

Regin Jacobsen forstjóri Bakakfrosts tók á móti nýjasta skipi færeyska skipaflotans. Ljósmynd/Bakkafrost

Stefna að aukinni framleiðslu

„Við þurfum að sjá aukið framboð á sjálfbæru próteini. Sérstaklega er litið á fiskeldi og laxeldi sem eina bestu lausnina fyrir sjálfbæra matvælaframleiðslu þegar hugað er að sjálfbærni í víðasta skilningi. Færeyjar bjóða upp á fjölmörg tækifæri – því er afar mikilvægt að vilji, kunnátta og reglugerðir auðveldi nýtingu þessara tækifæra,“ sagði Regin í ræðunni. Með Bakkafossi stígum við risastórt skref í átt að bæði úthafsrækt og sjálfbærari rekstri,“ sagði Regin Jacobsen, forstjóri Bakkafrosts, í ræðu sinni við komu skipsins.

„Framtíðarsýn okkar fyrir Færeyjar er að auka framleiðslu okkar verulega til að auka almennt framboð á sjálfbæru sjávarfangi, sem stuðlar að sjálfbærri umbreytingu matvælakerfis heimsins.“

• Blogga um frétt