Akurey landað mestum þorski í upphafi árs
Á fyrstu tveimur vikum ársins, 1. janúar til 15. janúar, lönduðu 74 krókaaflamarksbátar og 76 aflamarksskip þorski – alls rúm 7.125 tonn. Þar af lönduðu aflamarksskipin 5.290 tonnum og krókaaflamarksbátarnir tæplega 1.835 tonnum.
Samkvæmt löndunartölum Fiskistofu fyrir tímabilið landaði Akurey AK-10 mestum þorski eða rétt rúmlega 251 tonni. Næst á eftir er Málmey SK-1 með tæp 244 tonn, svo Páll Pálsson ÍS-102 með 220 tonn, Viðey RE-50 með 212 tonn og skipið með fimmta mesta þorskaflan var Drangey SK-2 með 203 tonn.
Meðalafli aflamarksskipanna fyrstu tvær vikur ársins nam rúmlega 69 tonnum af þorski.
Sunnutindur efstur krókabáta
Þegar litið er til þeirra báta sem veiða innan krókaaflamarkskerfisins var Sunnutindur SU-95 aflamestur í þorski tímabilið 1. til 15. janúar og landaði alls 105 tonnum.
Næst kemur Gullhólmi SH-201 með rúm 79 tonn, svo Sandfell SU-75 með rúmlega 74 tonn og Hafrafell SU- 65 með tæplega 74 tonn. Fimmta mesta þorskinn bar Stakkhamar SH-220 að landi, alls rúm 73 tonn.
Meðalafli krókaaflamarksbátanna sem lönduðu þorski á tímabilinu nemur 24,8 tonnum.