„Það var svolítið bras að ná þessu upp“
Náttúruöflin gera ekki alltaf boð á undan sér og það var sannanlega raunin hjá áhöfninni á Örvari SH-777 á dögunum. Þegar línubáturinn, sem Hraðfrystihús Hellisands gerir út, var staddur á Barðagrunni kom hafísinn skyndilega og var fögur sjón að sjá þó hann truflaði veiðarnar.
„Þetta gekk. Það var svolítið bras að ná þessu upp, við náðum aldrei línunni,“ útskýrir Vigfús Markússon, sem gegndi starfi stýrimanns á Örvari í þessum túr. „Strax og við náðum henni upp fórum við bara sunnar,“ segir hann. Ekki var þó haldið á brott án þess að Vigfús náði nokkrum myndum af breiðunni.
Spurður um aflabrögðin svarar Vigfús: „Þetta var allt í lagi, miðað við að við vorum ekki með nema 25 rekka í sjó. Það var engin ís þegar við lögðum, en hann er bara á svo mikilli ferð að hann var kominn á smá tíma. Sáum hann daginn áður en hann kom og þá var smá í hann, en svo var hann allt í einu kominn yfir allt.“
Örvar landaði á Rifi í morgun, en túrinn var ekki langur að þessu sinni. „Fjórar lagnir og svo stoppuðum við tvo daga í landi. Það er verið að spara kvótann. Það eru allir að verða kvótalitlir, það var svo góð veiði í haust,“ útskýrir Vigfús.
