Vilja ekki fullyrða af hvaða vél brakið er

Hvorki lögreglan né Rannsóknarnefnd samgönguslysa vilja fullyrða neitt um það af hvaða flugvél brakið er sem áhöfnin á Hrafni Sveinbjarnarsyni GK-255 fékk í trollið á miðvikudag. Með brakinu komu einnig upp líkamsleifar, stór hluti af höfuðkúpu, að sögn skipstjóra.

Lögreglan á Suðurnesjum hefur fengið sendar myndir af brakinu en lögreglustjóri segir ekki tímabært að segja til um það úr hvaða vél brakið er.

Frétt af mbl.is

Fengu flugvélabrak og höfuðkúpu í trollið

„Klárlega eru menn að velta fyrir sér hvað er þarna er á ferðinni en við erum ekki komnir á þann stað að fullyrða eitt né neitt um það úr hvaða flugvél þetta brak er,“ segir Úlfar Lúðvíksson, lögreglustjóri á Suðurnesjum, í samtali við mbl.is.

„Nú bíðum við bara eftir því að brakið komi á land, svo verður þetta skoðað,“ bætir hann við, en skipið er væntanlegt til hafnar þann 22. mars næstkomandi.

Ekki talin þörf á flýta heimför

Kennslanefnd ríkislögreglustjóra mun rannsaka líkamsleifarnar þegar þær koma í land og rannsóknarnefnd samgönguslysa brakið úr vélinni.

„Okkur hefur verið tilkynnt um þetta og skoðum þetta bara þegar það kemur í land. Þá sjáum við hvert það leiðir okkur. Við viljum ekki leggja neitt mat á þetta fyrir það,“ segir Þorkell Ágústsson, rannsóknarstjóri flugsviðs Rannsóknarnefndar samgönguslysa, spurður hvort liggi fyrir einhverjar hugmyndir af hvaða flugvél brakið er.

Skipið var á veiðum á Jök­ul­dýpi, um 50 míl­ur vest­ur af Reykja­nesi þegar brakið kom í veiðarfærin. Haft var samband við Landhelgisgæsluna og fékk áhöfnin fyrirmæli um varðveislu braksins og líkamsleifanna. Lögreglan taldi ekki þörf á því að skipið kæmi fyrr til hafnar vegna fundarins.

• Blogga um frétt