Tæp tvö þúsund tonn voru eftir til vinnslu hjá verksmiðjum Síldarvinnslunnar í Neskaupstað og á Seyðisfirði þegar rýma þurfti vinnustaðina í gærmorgun vegna snjóflóðahættu. 

Á vef Síldarvinnslunnar, þar sem frá þessu er greint, kemur fram að síðasta loðnulöndun í Neskaupstað, þar sem 900 tonn eru eftir til vinnslu, hafi verið úr grænlenska skipinu Polar Ammassak á laugardag og sú loðna hafi farið til hrognavinnslu. 

Á Seyðisfirði, þar sem þúsund tonn eru eftir til vinnslu, var síðasta löndunin á sunnudag. Eftir að ákveðið var að rýma voru báðar verksmiðjurnar keyrðar niður með lágmarksstarfsmannafjölda í samráði við Veðurstofu Íslands.

Haft er eftir Geir Sigurpáli Hlöðverssyni, rekstrarstjóra fiskiðjuversins í Neskaupstað, að allri vinnslu hafi verið lokið í fiskiðjuverinu í Neskaupstað áður en snjóflóðahættan skapaðist. „Við lukum frystingu á loðnuhrognum aðfaranótt sunnudags og það var lokið við að þrífa á sunnudagsmorgun þannig að enginn var að störfum í fiskiðjuverinu þegar hættuástandið skapaðist,“ er haft eftir honum.

Þá er haft eftir Ómari Bogasyni, rekstrarstjóra frystihúss Síldarvinnslunnar á Seyðisfirði að ákveðið hafi verið að afboða starfsfólk frystihússins í gærmorgun áður en tilkynning um rýmingu barst.

Tengdar fréttir

Snjóflóð á Austfjörðum

Forgangsraða þurfi svokallaðri Fjarðaleið

• Prófun á SMS-rýmingar­boði á mið­viku­dag
• Guðni forseti skoðar áhrif snjóflóðanna
• Ekki hægt að tryggja SMS-boð um rýmingu
• Ný stefna vegna náttúruvár lögð til

» Fleiri tengdar fréttir

• Blogga um frétt