Fyrsta Hringborð fiskeldis verður haldið í Reykjavík
Ný samtök um Hringborð fiskeldis (Icelandic Aquaculture and Ocean Forum, IAOF) stefna að því að halda fyrstu ráðstefnu sína í Reykjavík 1. og 2. júní næstkomandi. Aðild að samtökunum eiga flest starfandi fiskeldisfyrirtæki á landinu og er Arion banki sérstakur stuðningsaðili þeirra.
Markið er sett hátt og er stefnt að því að Hringborð fiskeldis verði vettvangur alþjóðlegs samstarfs og miðlunar þekkingar um fiskeldi í sjó og á landi, áskoranir tengdar loftslagsbreytingum, nýtingu og aðra þætti sem hafa grundvallarþýðingu fyrir sjálfbæra þróun eldis hér á landi, að því er frma kom í Morgunblaðinu í gær.
„Við viljum eiga þetta spjall við yfirvöld og helstu stofnanir um framtíðarmarkmið og stefnumótun á sviði fiskeldis. Grundvöllurinn er að miklu leyti skýrsla Boston Consulting Group [um stöðu og framtíð lagareldis á Íslandi],“ útskýrir Kjartan Ólafsson, stjórnarformaður Hringborðs fiskeldis.
„Það eru gríðarstór verkefni framundan og þetta eru einhver stærstu einkaframkvæmdir Íslandssögunnar. Það hefur verið fjárfest gríðarlega í sjókvíaeldi og eru stórar fjárfestingar í gangi á landi og það er þörf á skýrari langtímamarkmiðum,“ útskýrir Kjartan og vísar meðal annars til þeirra stóru fjárfestingaverkefna sem stefna að framleiðslu tugþúsunda tonna af eldislaxi á landi.
