Felldu niður vsk á ferskan og saltaðan þorsk

Ferskur og saltaður þorskur er nú undanskilinn virðisaukaskatti í Portúgal. Áður var lagður á þessar afurðir 6% virðisaukaskattur en frá 18. apríl síðastliðnum til 31. október næstkomandi er skatturinn ekki innheimtur.

„Spurn eftir saltfiski hefur aukist lítillega á undanförnum vikum en ég tengi það ekki endilega því að virðisaukaskatturinn var afnuminn. Það þarf lengri tíma til að draga slíkar ályktanir. Við höfum annars sterka stöðu og markaðshlutdeild með íslenska saltfiskinn sem er hátt skrifaður hér,“ segir Nuno Araujo, framkvæmdastjóri Grupeixe, í færslu á vef Vinnslustöðvarinnar en Grupeixe er dótturfélag íslensku útgerðarinnar.

„Laun eru lág í Portúgal, verðbólga, rýrnandi kaupmáttur, háir vextir og hátt húsnæðisverð. Venjulegar fjölskyldur eiga í erfiðleikum með að eignast eða leigja íbúðir. Í slíku ástandi er matvörumarkaðurinn erfiður og samkeppni þar mikil og hörð. Húsnæðismálin og vextirnir eru mál málanna í samfélagsumræðunni hérna. Ljós punktur er að atvinnuleysi er tiltölulega lítið og tekjur af erlendum ferðamönnum koma sér vel nú sem fyrr,“ segir Nuno.

Tímabundin undanþága frá virðisaukaskatti var samþykkt til að létta undir kostnaði heimilanna í landinu, en að óbreyttu tekur skattheimtan gildi á ný í nóvember.

• Blogga um frétt