Myndir: 30-40 þúsund manns mættu á sjómannadaginn

Sjómannadagurinn fór hvarvetna vel fram. Engin undantekning var frá því í Reykjavík.

Þétt skemmtidagskrá var í boði fyrir gesti og gangandi við hafnarsvæðið og kenndi þar ýmissa grasa. Meðal annars var boðið upp á hinn sívinsæla koddaslag þar sem markmiðið er að koma andstæðingnum úr jafnvægi þannig að hann falli og vökni í sjónum. Sjá má á svip þess sem fellur fyrst að hann veit af ísköldum faðmi sjávar sem bíður hans.

Skemmtidagskráin hófst á Granda upp úr hádegi eftir skrúðgöngu frá Hörpu. Aríel Pétursson formaður Sjómannadagsráðs segir skipuleggjendur hátíðarinnar hafa haft áhyggjur af dræmri mætingu í ár í samanburði við sjómannadaginn fyrir ári en þá var veðrið betra.

„Höfuðborgarbúar hafa ekki látið það á sig fá,“ segir Aríel. Skipuleggjendur telja að á bilinu 30.000 til 40.000 manns hafi komið við í gær, sem er meira en í fyrra.

Fjölbreytt dagskrá bauðst gestum. Meðal annars sigling með varðskipinu Freyju, sem um þrjú þúsund manns nýttu sér, fiskisúpa í boði Brims, furðufiskasýning og andslitsmálning og fleira.