„Hruflaðist“ þegar smábátur strandaði

Smábátur strandaði rétt innan við Arnarstapa á tíunda tímanum í gærkvöldi og ætlar varðskipið Freyja að reyna að koma honum aftur á flot.

Að sögn Ásgeirs Erlendssonar, upplýsingafulltrúa Landhelgisgæslunnar, hafði skipstjórinn samband við Gæsluna og lét vita af óhappinu en tók fram að engin yfirvofandi hætta væri fyrir hendi. 

Hæglætisveður var á svæðinu og aðstæður góðar.

Gæslan kallaði út varðskipið Freyju og sjóbjörgunarsveitina á Rifi. Einnig voru björgunarsveitir á landi kallaðar út ásamt lögreglu.

Varðskipið Freyja á Skjálfandaflóa. mbl.is/Hafþór Hreiðarsson

Lögreglan flutti manninn á sjúkrastofnun í Ólafsvík eftir að hann „hruflaðist eitthvað við strandið”, að sögn Ásgeirs.

Björgunarsveitir unnu að því að undirbúa aðgerðir í nótt við að koma bátnum af staðnum og gert er ráð fyrir því að Freyja komi bátnum á flot.

Spurður segist Ásgeir ekki vita um skemmdir á bátnum.

Uppfært kl. 9.22:

Flaut yfir bátinn í morgun og fór m.a. sjór í lestina. Þess vegna þarf að létta bátinn og dæla úr honum áður en hann verður dreginn í burtu.

Að öðru leyti er báturinn óskemmdur.

Að sögn Ásgeirs er búist við því að báturinn verði dreginn í burtu í kvöld.

• Blogga um frétt