Lýsa ánægju með Ölduna

Félag skipstjórnarmanna (FS) ákvað í síðasta mánuði að leggja til eina milljón króna í styrk til stuðnings við áframhaldandi þróun á öryggisstjórnunarkerfinu Öldunni, að því er fram kemur í Morgunblaðinu.

Í færslu á vef sínum hvetur FS ásamt Samtökum fyrirtækja í sjávarútvegi (SFS) „alla hagaðila í sjávarútvegi til að leggja sitt af mörkum og styðja við þetta frumkvöðlastarf í nútímavæðingu á öryggismálum fiskiskipa og sjómanna“.

Frétt af mbl.is

Samherji bætist í hóp útgerða með Ölduna

Í kjarasamningi FS og SFS frá 9. febrúar er ákvæði um að starfrækja eigi sameiginlega öryggisnefnd sem á meðal annars að vinna að forvörnum, útbúa fræðsluefni, hvetja sjómenn til þess að skrá og tilkynna frávik í starfsemi, styðja við rannsóknir á slysum og leggja til úrbætur.

Fyrsta verk nefndarinnar var að kynna sér Ölduna. „Báðir aðilar lýsa yfir ánægju sinni með nýsköpunina og þróunina á öryggisstjórnunarkerfinu Öldu sem hefur þann tilgang að nútímavæða öryggisstjórnun til sjós með stafrænum lausnum,“ segir í færslunni.

Fjallað er um málið í Morgunblaðinu í dag.