Samþykktu notkun lúsalyfja á Tálknafirði
Setja bókamerki
Fiskisjúkdómanefnd ákvað á fundi sínum 4. september að mæla með því að Matvælastofnun samþykki tvær umsóknir um notkun lyfja gegn laxalús vegna fjölgun lúsa á eldislaxi í sjókvíum í Tálkanfirði. Þá var lagt til að afgreiðsla tveggja umsókna um notkun lyfja í Arnarfirði yrði frestað og að umsókn um lúsameðhöndlun í Patreksfirði yrði hafnað.
Þetta kemur fram í fundargerð nefndarinnar sem birt hefur verið á vef Matvælastofnunar.
Í fundargerðinni segir að út frá fyrirliggjandi gögnum um stöðu og þróun hafi Fisksjúkdómanefnd mælt með lúsameðhöndlun á eldislaxi með Salmosan (Azamethiphos) lúsalyfi í Hvannadal í Tálknafirði. Einnig taldi nefndin að tilefni væri til að mæla með notkun Salmosan og að hluta til Slice (Emamectin) lúsalyfi í Laugardal i Tálknafirði.
Afgreiðslu frestað
Nefndin taldi hins vegar rétt að fresta afgrieðslu umsóknar um leyfi til lúsameðhöndlunar á eldislaxi með Salmosan í Hvestu í Arnarfirði. „Að mati nefndarinnar er síðasta niðurstaða lúsatalningar á umræddu eldssvæði ekki þannig vaxin að ástæða sé til lyfjameðhöndlunar að sinni. Nefndin mælir með að afgreiðslu umsóknar verði frestað þar til frekari upplýsingar liggja fyrir. Nefndin leggur áherslu á að áfram verði fylgst með fjölda sníkjudýra á eldissvæðinu með vikulegum talningum og að gripið verði til viðeigandi ráðstafana ef svo ber undir.“
Þá var einnig komist að sömu niðurstöðu vegna umsóknar um lúsameðhöndlun á eldislaxi í Hringsdal í Arnarfirði.
Ekki var talin ástæða til að mæla með notkun Salmosan í Kvígindisdal í Patreksfirði. „Að umfjöllun lokinni komst fisksjúkdómanefnd að þeirri samdóma niðurstöðu að mæla ekki með því við Matvælastofnun að heimila umbeðna lyfjameðhöndlun í Patreksfirði. Þar eru lúsatölur vissulega háar, en verið er að slátra upp af svæðinu og er áætlað að þeirri framkvæmd verði lokið um miðjan september. Útfrá umhverfis- og velferðarsjónarmiðum fisksins hníga flest rök að þeirri niðurstöðu að ekki sé rétt að meðhöndla með lúsalyfi. Um sé að ræða neyðarráðstöfun sem nái ekki tilgangi sínum fáum dögum fyrir slátrun.“
Von der Leyen mætt og á leið að skoða gosið
„Við munum ekki sitja hljóð og horfa á“
Lokuðu veginum að Bláa lóninu í mótmælaskyni
Fyrirtækjaeigendur í Grindavík mótmæla mismunun
Formgalli útskýrir af hverju umsóknin er virk
Aðstæður á Bjargi ekki boðlegar
Skelfileg tilfinning að sjá listann