10 milljónir á dag í 30 daga

Áhöfnin á Arnari HU-1 getur verið sátt með sitt eftir að hafa skapað verðmæti fyrir 10 milljónir á dag að meðaltali á síðasta túr. Togarinn kom til Sauðárkróks í dag með 810 tonna afla að verðmæti 300 milljóna króna. Er þetta fyrsta löndun frystitogarans á fiskveiðiárinu.

„Veiðiferðin hófst að kvöldi 11. ágúst og stóð hún yfir í 30 daga. Að langstærstum hluta var verið að veiðum á Vestfjarðarmiðum en einnig vorum við á Tungunni og lítillega á fjöllunum,“ segir Bárður Eyþórsson, skipstjóri á Arnari HU, í færslu á vef FISK Seafood.

„Það var fín veiði en við hefðum viljað sjá aðeins meira af ufsa. Mikið af karfa er á halanum og eiga skip oft í vandræðum út af honum. Veður í túrnum var mjög gott fyrir utan 3-4 daga sem kaldaði upp. Skipið er með um 21.500 kassa sem gera um 810 tonn uppúr sjó og aflaverðmætin eru um 300 milljónir,“ segir Bárður.

Drangey SK-2 kom einnig til hafnar á Sauðárkróki í dag og var heildaraflinn um 156 tonn. Uppistaða aflans er þorskur en Drangey hafði verið á veiðum á Deildargrunni.

Þá kom Sigurborg SH-12 til hafnar á Grundarfirði með 82 tonn og var uppistaðan ýsa, karfi, þorskur og steinbítur. Sigurborg var meðal annars á veiðum á Látragrunni.

• Blogga um frétt