Ætlast til þess að dýpkun sé greidd af ríkissjóði

Þörf er á varanlegri lausn í tengslum við dýpkun innsiglingarinar að Höfn í Hornafirði, að sögn Sigurjóns Andréssonar bæjarstjóra. Fagnar hann því í viðtali í Morgunblaðinu í dag að tekist hafi að leysa málið yfir komandi vetur en hafnarsjóður Hornafjarðar er að bera verulegan kostnað af dýpkuninni  þrátt fyrir að verkefnið sé á ábyrgð ríkisins.

„Þetta er utan hafnarinnar og í ljósi þess ætlumst við til þess að þetta sé greitt úr ríkissjóði,“ segir Sigurjón.

Höfn í Hornafirði. mbl.is/Gunnlaugur

Dýpkunin hefur verið forsenda stórfelldrar uppbyggingar vinnslu Skinneyjar-Þinganess á svæðinu þar sem útgerðin þarf að geta komið stærri skipum af bryggju til löndunar.

„Sjávarútvegurinn hefur allt að segja fyrir samfélagið hérna. Við erum svo heppin að hafa öflug fyrirtæki hér á staðnum sem eru í eigu heimafólks og láta sig samfélagið, samfélagsmál og samfélagsábyrgð varða. […] Skinney-Þinganes sem er okkar öflugasta og mikilvægasta fyrirtæki hér í Hornafirði er að fara í mikla uppbyggingu í vinnslu á uppsjávarfiski og byggingu nýs frystiklefa sem og að endurnýja flota sinn. Þetta eru hlutir sem hafa í raun allt að segja fyrir framtíð okkar hérna í Hornafirði,“ segir Sigurjón.

Ítarlega er rætt við Sigurjón um atvinnulífið í Hornafirði í Morgunblaðinu í dag.