Lönduðu 114 þúsund tonnum í ágúst

Íslenski fiskiskipaflotinn landaði 114,5 þúsund tonnum í ágúst sem er 10% meiri afli en á sama tíma í fyrra. Um er að ræða rúmlega tíu þúsund tonna aukningu í afla og má rekja það aðallega til makrílveiða sem skiluðu 10,5 þúsund fleiri tonnum í ágúst síðastliðnum en 2022.

Þetta má lesa úr talnagögnum Hagstofu Íslands. Þar kemur fram að landað var 78 þúsund tonnum af uppsjávarafla í ágúst á móti 32 þúsund tonnum af botnfiskafla.

Þorskaflinn dregst saman um 11% í 12.697 tonn sem er ekki óvænt í ljósi þess hve margir kláruðu heimidlir sínar í vor. Þá jókst ýsuaflinn um 29% í 5.659 tonn auk þess sem skipin lönduðu 6.036 tonnum af karfa sem er 32% meira en í ágúst í fyrra.

Heildarafli fiskveiðiársins 1,3 milljónir

Heildarafli á fiskveiðiárinu 2022/2023 var 1.370 þúsund tonn sem er 9% minni afli en landað var fiskveiðiárið á undan.

Mestu áhrfin í tonnum má rekja til sveiflna í loðnuaflanum en vertíðin í vetur skilaði 330 þúsund tonnum sem er 37% minni afli en á vertíðinni á undan. Er þróunin í takti við ráðgjöf Hafrannsóknastofnunar um minni hámarksafla í tegundinni Þá jókst kolmunnaaflinn og makrílaflinn.

Afli botnfisktegunda dróst saman um 25 þúsund tonn milli fiskveiðiára og var mesti samdrátturinn í þorski og karfa, en mikil aukning var í ýsuaflanum. Á fiskveiðiárinu má búast við að þorskaflinn aukist í samræmi við ráðgjöf, á það einnig við karfa og ýsu þar sem myndarleg aukning hefur átt sér stað í útgefnum veiðiheimildum.

• Blogga um frétt