Síldin úr Héraðsflóa úrvalsvara

Beitir NK kom til Neskaupstaðar í gærmorgun með 1.580 tonn af síld og fékkst aflinn í fjórum holum sunnarlega á Héraðsflóa, að sögn Sturlu Þórðarsonar skispstjóra.

Í færslu á vef Síldarvinnslunnar segir hann ekki mikið hafa verið að sjá þegar Beitir mætti á miðin en allt í einu hafi birst fullt af síld. „Í síðasta holinu fengust tæp 800 tonn og það var einungis dregið í 50 mínútur. Þegar síldin birtist var hörkuveiði hjá öllum bátunum sem þarna voru. Síldin er stundum svona; það er lítið að sjá eina stundina en augnabliki síðar er allt gjörbreytt. Veiðarnar hafa gengið vel að undanförnu og allt útlit fyrir að svo verði áfram.“

Vinnsla aflans hófst síðdegis í gær í fiskiðjuveri Síldarvinnslunnar og segir Oddur Einarsson, yfirverkstjóri í fiskiðjuverinu, í fræslunni að síldin úr Beiti sé í hæsta gæðaflokki. „Síldin er eins fersk og hún getur verið og hentar í alla staði vel til vinnslu. Við erum að framleiða samflök og síðan er stærsta síldin heilfryst. Þetta er úrvalsvara.“

• Blogga um frétt