Vita ekki hvað gerðist

Þorsteinn Sigurðsson, forstjóri Hafrannsóknarstofnunar, segir að ekki sé vitað nákvæmlega hvað gerðist þegar hafrannsóknarskipið Bjarni Sæmundsson tók niðri í Tálknafirði á tíunda tímanum í gærkvöld.

Frétt af mbl.is

Bjarni Sæmundsson náðist á flot

„Mikilvægast að allir væru tryggir“

„Þegar þetta gerist þá er fyrst og síðast að hugsa um fólkið og það er það sem verkefnið hefur snúist um. Hitt á eftir að koma í ljós, hvað nákvæmlega gerðist, ég hef ekki einu sinni spurt um það enda var mér mikilvægast að allir væru tryggir.“

Skipið var við rannsóknir og stofnvakt á grunnslóðarrækjunni í Arnarfirði og Ísafjarðardjúpi. Samhliða var verið að sinna rannsóknum og vöktun á áhrifum fiskeldis. Að sögn Þorsteins voru 20 manns um borð, sex rannsóknarmenn og 14 manna áhöfn.

„Menn eru enn að átta sig á aðstæðum og verið er að skoða skemmdir en fyrst og síðast er okkur í huga þakklæti að ekki fór verr en þetta.“

Kafarar að meta skemmdir

Segist Þorsteinn ekki vita um skemmdir eða umfang þeirra, ef einhverjar eru, en kafarar eru að störfum.

„Ákvarðanir um framhaldið verða teknar í ljósi niðurstöðu vinnu kafaranna. Þeir ættu að vera í kafi núna miðað við þær fréttir sem bárust mér á tíunda tímanum í morgun.“

• Blogga um frétt