Norskt hvalskip með metveiði
Setja bókamerki
Norska hvalskipið Kato, það stærsta í hvalveiðiflota landsins, hefur ekki verið fengsælla nokkru sinni en á yfirstandandi vertíð og hefur nú veitt 220 hrefnur. Kato landar nú í Ålesund eftir hálfs árs úthald.
„Við höfum veitt um 370 tonn og það er metveiði,“ segir Dag Myklebust skipstjóri í samtali við norska ríkisútvarpið NRK en hann á 54 ára feril að baki við hvalveiðar. Kveður hann áhöfnina hafa verið heppna með veður auk þess að hafa oftar en ekki náð að vera á réttum stað á réttum tíma. Þannig skýrir hann fengsæld áhafnarinnar í túrnum.
Öll veiðin verður útflutt til Japans sem skipstjórinn telur jákvætt þar sem þar í landi sé meira nýtt af hvalnum en í Noregi þar sem aðeins kjötið sé nýtt.
Berjast fyrir banni
Þrátt fyrir metveiði áhafnarinnar á Kato í þessum túr er enn töluvert eftir óveitt af kvóta þessarar vertíðar sem er 1.200 hvalir. Það sem af er hafa 506 verið veiddir en stofninn við Noreg telur um 100.000 dýr.
Aðeins Ísland, Japan og Noregur leyfa hvalveiðar og hafa norsku dýraverndarsamtökin Noha löngum barist fyrir því að veiðarnar verði bannaðar í Noregi. Siri Martinsen, upplýsingafulltrúi samtakanna, kveður margar ástæður fyrir þessu.
„Það er með tilliti til dýraverndarsjónarmiða, einn af hverjum fimm veiddum hvölum þjáist umtalsvert auk þess sem við horfum til umhverfissjónarmiða, hvalir eru hafinu mikilvægir. Að lokum hefur vísindaráðið fæðu- og umhverfismála slegið því föstu að þróun hrefnustofnsins sé óþekkt,“ segir Martinsen.
Aldrei eldri en maður upplifir sig
Myklebust skipstjóri segir gagnrýni á hvalveiðar ekki alltaf endurspegla raunveruleikann. „Fólki verður að leyfast að hafa mismunandi skoðanir en þær þarf að rökstyðja af þekkingu og með réttum upplýsingum,“ segir hann.
Myklebust er engan veginn tilbúinn að leggja árar í bát þrátt fyrir að vera að heiman mánuðum saman í einu og hafa verið til sjós í á sjötta tug ára. Hann hyggur á fleiri hvalveiðitúra á Kato. „Maður er aldrei eldri en maður upplifir sig, vertíðirnar verða fleiri,“ segir skipstjórinn gamalreyndi.
