Björgúlfur landað langmestum þorski í september

Björgúlfur EA-312 hefur landað 581 tonni af þorski í september langmest allra. Á eftir fylgir Sólberg ÓF-1 með tæp 554 tonn, Drangey SK-2 með rúmlega 545 tonn, Björg EA-7 landaði tæpum 496 tonnum og Málmey SK-1 rúmlega 465 tonnum.

Í september, sem er jafnframt fyrsti mánuður fiskveiðiársins 2023/2024, kom Vígur SF-80 með rúmlega 176 tonn af þorski sem er mesti afli í tegundinni meðal krókaflamarksbáta. Landaði Sandfell SU-75 heilum 168 tonnum, en nokkuð er í næsta bát og kom Gísli Súrsson GK-8 til hafnar með rúm 107 tonn af þorski. Á eftir fylgir Indriði Kristins BA-751 með rétt rúm 98 tonn og svo Auður Vésteins SU-88 með tæp 88 tonn.

Íslenski fiskiskipaflotinn hefur landað 13.866 tonnum af þorski í september. Það eru rétt rúm 8% af þeim 167.162 tonnum af þorski sem skip með kvóta er heimilt að veiða á fiskveiðiárinu.

Samkvæmt skráningu Fiskistofu hafa 245 skip og bátar landað þorski á þessum fyrsta mánuði, þar af 115 með aflamark og 130 með krókaaflamark. Eftir eru 71 skip með aflamark sem ekki hafa landað afla og 159 bátar með krókaaflamark sem ekki hafa landað þorski á fyrsta mánuði fiskveiðiársins.

• Blogga um frétt