Segja nóg komið og hóta aðgerðum

„Nú er komið nóg. Það er kominn tími til að landa lausnum og hætta ofveiði í Norðaustur-Atlantshafi,“ segir í opnu bréfi sem verndarsamtök uppsjávarstofna á Norður-Atlantshafi hafa sent ráðherrum sjávarútvegsmála í Bretlandi, Noregi, Íslandi, Færeyjum, Grænlandi og Rússlandi auk framkvæmdastjóra sjávarútvegsmála hjá Evrópusambandinu.

Tvö ár eru liðin frá því að samtökin, sem starfa undir skammstöfuninni NAPA (North Atlantic Pelagic Advocacy Group), tilkynntu á Hringborði Norðurslóða í Hörpu að 40 stórir alþjóðlegir kaupendur uppsjávarafurða hafi skuldbundið sig til að leita að öðrum afurðum ná strandríkin ekki að komast að samkomulagi innan þriggja ára sem tryggir að veiðar á makríl, norsk-íslenskri síld og kolmunna verði innan vísindalegrar ráðgjafar. Fresturinn rennur s.s. út á næsta ári.

Frétt af mbl.is

Hóta þvingunaraðgerðum að loknum þremur árum

Strandríkin eru sammála um að fylgja ráðgjöf um hámarksveiði, en eru engu nær hvað varðar samninga um hvernig eigi að skipta aflahlutdeildunum og því hafa ríkin gefið út veiðiheimildir til sinna skipa sjálfstætt á grundvelli þess hlutdeildar sem ríkin segjast eiga tilkall til. Vegna þessa hafa stofnarnir þrír verið ofveiddir um nokkurt skeið.

„Strandríki, framtíð fiskistofna í Norðaustur-Atlantshafi er í þínum höndum. Hvað þarf til að þú styður sjálfbæra sjósókn og vel stjórnaðar fiskveiðar?“ er spurt í bréfi NAPA.

Útbreiðsla kolmunna makríls og norsk-íslenskrar síldar. Engir samningar eru til staðar um skiptingu aflahlutdeildar milli strandríkjanna. Kort/mbl.is

Leita annarra hráefna

„Við, NAPA, erum fulltrúar heimsmarkaðs sjávarafurða á Norðaustur-Atlantshafi. Við erum að skrifa þér til að segja þér að nú sé komið nóg. Sjálfbærar fiskveiðar á Norðaustur-Atlantshafi verða að vera forgangsverkefni ykkar. […] Við biðjum ykkur um að hverfa ekki frá viðræðum þessa árs án samhljóða og sjálfbærs samkomulags um afla fyrir árið 2024,“ sagði í bréfinu.

„Aðgerðarleysi ykkar hingað til dregur birgðakeðjuna til að endurskoða kaupákvarðanir sínar. Ef ekki næst sjálfbær stjórnun [veiða] munu félagsmenn okkar íhuga að taka málin í sínar hendur.“

Frétt af mbl.is

Segir Norðmenn bera mesta ábyrgð á ofveiði

Í bréfinu er vísað til yfirlýsinga fjölda fyrirtækja og er sérstaklega vakin athygli á því að breska verslunarkeðjan Asda hyggst hætta að kaupa makríl frá veiðisvæði 27, sem er alþjóðleg skilgreining á Norðaustur-Atlantshafi. Jafnframt heitir Skretting Norway, í Noregi, því að hætta að kaupa fiskimjöl sem framleitt er með kolmunna.

„Við myndum hætta að kaupa þetta hráefni þar sem við vinnum eftir háum stöðlum um ábyrg innkaup,“ segir í yfirlýsingu Biomar sem er stór framleiðandi fóðurs fyrir fiskeldi. Auk þess hyggst breska kráarkeðjan Young´s ekki ætla að kaupa afurðir sem innihalda fisk frá þessu svæði.

Frétt af mbl.is

„Þurfum einhvern til að taka af skarið“

• Blogga um frétt