Um 27% af veltunni kemur frá fiskeldi

Það er til marks um vaxandi umsvif fiskeldis og þann fjölda afleiddra starfa sem hefur orðið til í kringum greinina, að Hampiðjan vígði á dögunum 1.800 fermetra byggingu á Ísafirði sem mun hýsa nýtt netaverkstæði og þjónustustöð fyrir fiskeldisfyrirtækin á svæðinu.

„Hampiðjan hefur starfrækt netaverkstæði á Ísafirði um árabil, en verið í gömlu húsnæði sem starfsemin hafði sprengt utan af sér. Í nýja húsinu verður, auk netaverkstæðis, björgunarbátaþjónusta, verslun með útgerðar- og rekstarvörur, og búnaður til að hreinsa fiskeldiskvíar og bera á þær ásætuvarnir,“ útskýrir Jón Oddur Davíðsson framkvæmdastjóri Hampiðjan Ísland, í viðtali í síðasta blaði 200 mílna.

Eins og lesendur vita er Hampiðjan Ísland hluti af stærri samsteypu, Hampiðjan Group, sem er með starfsemi víða um heim. Móðurfélagið festi á sínum tíma kaup á færeyskum og norskum fyrirtækjum sem höfðu sérhæft sig í þjónustu við fiskeldi, og vegur þjónusta við fiskeldi núna þungt í rekstri samsteypunnar. „Enn sem komið er myndar fiskeldi ekki stóran hluta af starfsemi okkar á Íslandi, en fer sá hluti rekstrarins þó hratt vaxandi. Hjá samstæðunni allri myndar þjónusta og vörur fyrir fiskeldisgeirann hins vegar um 27% af veltunni,“ segir Jón Oddur.

Lesa má viðtalið við Jón Odd í heild sinni í síðasta blaði 200 mílna.