Sjö bátar úr smábátahöfninni í Grindavík
Setja bókamerki
Sjö bátum var í dag siglt úr smábátahöfninni í Grindavík. Allir togarar og línubátar eru farnir úr höfninni en um 10 strandveiðibátar eru enn eftir og er beðið eftir betri veðurskilyrðum til að sigla þeim út úr höfninni.
Þetta segir Sigurður A. Kristmundsson hafnarstjóri Grindavíkurhafnar í samtali við mbl.is.
Landhelgisgæslan stýrði þessum aðgerðum í samvinnu við höfnina og ákveðið var að hleypa af stað þeim sem treystu sér til vegna ölduhæðar.
„Það er alveg á mörkunum hvort að ölduhæðin leyfi þeim allra minnstu að fara og það voru sumir sem ákváðu að fara ekki,“ segir hann en bætir við að „stærri gerðin“ af smábátunum hafi farið í dag, þar á meðal hafnsögubátur Grindavíkur.
Bíða eftir betra veðri
Bátarnir fóru í Sandgerðishöfn í Suðurnesjabæ og fylgdi varðskipið Þór þeim eftir. Sigurður gerir ráð fyrir því að bátarnir sem enn eru í Grindavík verði færðir um leið og veðurskilyrði batna.
Hafnarstjórinn á hús eins og aðrir Grindvíkingar og er mbl.is náði af honum tali voru hann og konan hans nýbúin að rýma helstu nauðsynjar úr húsinu sínu.
Hann segir að þau hafi troðfyllt bílinn sinn af helstu nauðsynjum, sérstaklega fötum til skiptanna. Blessunarlega hafi húsið enn verið í fínu lagi.
