Sækja afurðir fyrir meira en 100 milljónir
Setja bókamerki
Hilmar Vignir Birkisson, starfsmaður Ægis sjávarfangs, var á fullu að lesta gáma og flutningabíla við starfsstöðvar fyrirtækisins í Grindavík þegar blaðamann mbl.is bar að garði í dag.
„Við erum að tæma lagerinn hjá okkur og bjarga verðmætum,“ segir Hilmar, en um er að ræða þorskalifur sem fer í tvo stóra gáma og þrjá flutningabíla. „Þetta eru yfir 100 milljónir í verðmæti,“ bætir hann við.
Fyrirtæki fengu tveggja tíma glugga frá klukkan 10 til hádegis, en eftir það er gert ráð fyrir að íbúar sem ekki komust til bæjarins í gær fái að fara þangað að sækja nauðsynjar.
Hilmar var ásamt einum öðrum samstarfsfélaga sínum á lyfturum að fylla gámana og hann sagði það eiga að duga, enda báðir vanir og snöggir.
Hann sagði enga hræðslu vera í mönnum að vera á staðnum og að þeir gætu komið sér fljótt í burtu ef aðstæður breyttust.
